309

 

„Hoch wol Etler Vester Hr. amts Keler

Zur fordters Meinen gehorsamen Dinst vnd gruß zue vermelten, ich Kann nit vntdter lasen zue berichten, wie daß den 21. dises Monadts von den fürstlichen hessischen Völchern ein hauptman Komen mit 40 gealerdte Man vndt daß alte schloß Reiffenberg angezindt vndt verbrandt wie wol eß zwar nit hat wollen brennen wegen vil schne vnd Eiß, so ist mir anbefolen bei Verlihrung Meineß Lebens vnd darbey der burgerschafft Ihre heusser abbrennen lassen, wo fehr sie daß angesteckhe feuer lasen außgehn, so ist auch in übrigen nach der handt von Königstein auch schriftlich Komen auf mein schreiben, daß der Hr. rendtmeister mir geschriben hat, es muß nitergerisen werdten. Zue disem so ist nit allein daß alte Schloß rongürdt (ruinirt) wordten, sondter auch der neue bau an dem furrchten hochen Thurm, in den Brand gesteckh durch 3 bödten durchgebrandt, so doch immer schath vor ist, so ist noch ein bodten von feuer ohnverlezt geblieben daß ihn daß feur in geringsten Kein schathen gethan hat, wie auch noch vil weniger den neuen Dachwerk noch stehet, so sole danoch nitergeleg werdten mit rath dieweil die schiefferstein vndt die bordt vnd der dachstul alleß neue ist in summa so Kinstlich von Zimrer gemacht ist daß Man desgleichen nit mer finden werdte, die Zimmer habe heindt besehen vnd sagen offenlich selbsten, daß es ein jamer vnd schathen vor seye den neuen bau, eß hat den Hr. von reiffenberg nur daß Dachwerk über 5 fl. gekostet vnd muß itzt durch lehre wordt also zu grund gehen. Es sey den hessen in himmel geklag.

Nun ist nit allein deren gemelte bau verbrand sondern auch Meineß genedtigen herrn seine mobilia zue reiner Eschen verbrandt daß in diesen bau darin in verwarung gestanden hat, ist nicht mer überig geblieben alß ein Eisen offenbladten, eine von hitz verschmolzen, eine an ein Ech daß halbe theil.

hete man mir gefolg, so wer diese sachen nit verbrandt vnd der Hr. Keler lasen hinwegh fihren, wie er in herbst den anfang gemacht so were der schathen nit geschehen, ich bin Endtschulthig dan ich habe über 5 Jahr lang gedriben Man sole diese sachen hinweg thun, Mein sagen hilft nicht itzo, alß damit gotteß schutz befolen Eur freund

Signatum Reiffenberg den 24 Januwary 1689.

                                                                          Caspar Brendel.